No est mai tropu tardu po imparai a chistionai e scriri in Sardu – III

Capìtulu 3

Nàscida de is macrobariedadis

In su Capìtulu 1 eus chistionau de is duas macro-bariedadis de su sardu (cun s’anfizona in mesu).
Comenti funt nàscias custas duas cambas mannas de su sistema linguìsticu sardu?
Ni po sorti ni po impèllida (spinta) de foras: is diferèntzias linguìsticas (chi nci fiant giai in su mesuevu e chi nci funt oi puru) intra logudoresu e campidanesu funt su sprigu de sa stòria, est a nai de su chi est sighiu a assumancu duas “undadas” printzipalis de latinisadura diferentis.

Su sardu de is Brabaxinus (su prus “arcàicu”) torrat cun su latinu de sa primu undada (a su chi parit de arribu africanu) lòmpia luegus apustis de sa cunchista arromana, cun is sordaus de su II e I sèculu antis Cristus (a.C.), unu latinu “clàssicu” chi est abarrau “firmu” e s’est strobeddau (sviluppato) pagu, giai totu inserrau me is montis: custu est acontèssiu po arraxonis siat stòricas, ca su poderi de su stadu ddoi disterràt (esiliava) genti e ddoi aposentàt (insediava) militaris chi si cojànt cun is fèminas de su logu, siat giogràficas,  ca is bias de intrada fiant difìtzilis e pagu seguras po is bardanas fitianas (frequenti razzie) chi is de “Barbària” faiant, e siat antropològicas (una cultura pruschetotu pastorali, duncas isulada, chi biviat in logus mannus meda e pagu abitaus). Is naturalis de custu latinu antigu chi funt abarraus in su brabaxinu-nugoresu-baroniesu funt sa pronùntzia velari de is liòngius CI, CE, GI, GE (chita, chelu, pache, ghirare, ghelu) e is sonus oclusivus surdus intra vocalis de C, P, T (pacu, fàchere, cupa, chita).

Àteras undadas de latinisadura (prus moderna, cun sa pronùntzia de is liòngius CI, CE, GI, GE giai cambiada de manera palatali) si funt aciuntas in Cabebàsciu, oru-oru de mari e peri is bias lateralis, in edadi imperiali de su I a su III sèculu pustis Cristus (p.C.), de arribu custa borta latziali e (forsis prus a tardu puru in Ollastra) de arribu campanu. In cussus logus duncas s’est inghitzau a intendi cita, celu, pace, girare, etc.

Forsis in cussa simana de tempus etotu, siat in Cabesusu che in Cabebàsciu s’est “allebiada” sa pronùntzia de is oclusivas surdas intra vocalis, chi si funt fatas fricativas sonoras: c(h)ida, paghe/paxe, pagu, cuba.

Custu diferentziamentu est sighiu in edadi artumesuevali candu in Cabebàsciu (po impèllida de s’aregu bizantinu) si funt serradas is vocalis de acabu -E e -O bessendi a -I e   -U: est imoi duncas chi s’est formada una de is isoglossas (is lìnias giogràficas chi partzint is logus anca unu tzertu sonu si pronùntziat de manera diferenti) chi prus fai scerai su logudoresu de su campidanesu (cane/cani, bonos/bonus, andare/andai, sèmpere/sèmpiri, cando/candu, etc.) giai chi pertocat unu nùmuru mannu meda de fueddus de totu is arratzas gramaticalis.

A s’acabu, in scritus ofitzialis de s’edadi giuigali (900-1400 p.C.), parint giai beni assentadas is tres macrobariedadis, segundu arrègulas gràficas, gramaticalis e de fueddàriu (logudoresu, arboresu e campidanesu).

Sa majoria de su diferentziamentu intra logudoresu e campidanesu fut duncas giai fatu, po mori de sa stòria de aìnturu de sa lìngua, a s’acabu de su 1300, candu funt lòmpius is cadalanus.

In s’interis s’impèllida de su pisanu, chi perou segundu medas linguistas at contau pagu, s’est intèndia forsis prus in su logudoresu de susu che in su campidanesu e at donau sa fricativisadura de S, R e L ananti de consonanti (no fait a arrapresentai beni sa pronùntzia, sceti chini ddas at intèndias ddas podit cumprendi): alhtu, pochhu, laghhu, èipe/epe, màsciu/màlciu po artu, porcu, largu, espe, masc(r)u, etc.; e sa palatalisadura de PL-, FL-, CL- a s’italiana: piùs, piata, fiore, fiùmene, giae, giaru contras a prus, prat(z)a, frore/-i, frùmene/-ini, crae/-i, craru, etc.

Intamis de àteru s’arribu de is lìnguas ibèricas s’est intèndiu prus in su fueddàriu (lessico) e in d-unus cantu fenòmenus gramaticalis chi no in sa fonètica (su cadalanu prus po su campidanesu, su castillianu prus po su logudoresu) giai chi a s’ora s’est imposta sa diglossia: una lìngua dominanti de s’ofitzialidadi (su cadalanu e agoa su spanniolu castillianu) e una lìngua dominada fueddada de sa genti comuni me is imperus de dònnia dii (su sardu).

sighit…

Stèvini Cherchi
No est mai tropu tardu…
[Premissa]
[Capitulu 1]
[Capitulu 2]
[Capitulu 2 Bis]

Annunci

8 risposte a “No est mai tropu tardu po imparai a chistionai e scriri in Sardu – III

  1. Pingback: No est mai tropu tardu po imparai a chistionai e scriri in Sardu – VII | mogoresbook

  2. Pingback: No est mai tropu tardu po imparai a chistionai e scriri in Sardu – V | mogoresbook

  3. Pingback: No est mai tropu tardu po imparai a chistionai e scriri in Sardu – V | mogoresbook

  4. Pingback: No est mai tropu tardu po imparai a chistionai e scriri in Sardu – IV | mogoresbook

  5. po ndi nai unu ‘e totu: mogoro!!!! mi benit tzipiri, urtzula…

    Mi piace

  6. Tzertu ca is sardus fueddànt innantis chi benessint is arromanus!!
    Sceti ca de sa lìngua de is nuraxesus no ndi scieus giai nudda (sarvu s’ùrtimu contributu chi su Prof. Blasco Ferrer s’at donau arraxonendi de is prus topònimus antigus chi abarrant pruschetotu in Brabaxa e in Ollastra, chi parit chi torrint a su paleo-basco: e duncas is pòpulus chi ant donau inghitzu a sa cultura nuraxesa forsis beniant pròpiu de inguni), e de su fenìciu-cartaginesu chi est lòmpiu apustis est abarrada pagu cosa beni in su sardu de oi.
    Ia a essi crosidadosu de sciri calis fueddus naras chi no tenint acàpiu cun is lìnguas stràngias.
    Stèvini

    Mi piace

  7. est de importu meda custu iscritu…
    sceti una cosa: parit ca is sardus ainantis de is romanus no fueddanta.
    is sa marmida e in sa trexenta est prenu de fueddus ca no portant nixiunu acapiu cun is ateras limbas istrangias…

    unu saludu

    Mi piace

  8. Pingback: Ainas po su sardu – 3 « Stèvini …su chercu

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...